European Tibetan Congress

ཡུ་ རོབ་ བོད་ རིགས་ ཀྱི་ ཚོགས་ ཆེན་ ཐེངས་ གཉིས་ པ།

In 2nd ETC on October 20, 2010 at 6:56 pm

ཡུ་ རོབ་ བོད་ རིགས་ ཀྱི་ ཚོགས་ ཆེན་ ཐེངས་ གཉིས་ པ།

འདོན་སྤེལ། ༢༠༡༠/༡༠/༡༨

ཡུ་ རོབ་ བོད་ རིགས་ མི་ མང་ ཚོགས་ ཆེན་ ཐེངས་ གཉིས་ པ་ དེ་ ཟླ་ འདིའི་ ཕྱི་ ཚེས་  ༡༦ དང་  ༡༧ རེས་ གཟའ་ སྤེན་ པ་ དང་ ཉི་ མའི་ ཉིན་ ཧྥ་ རན་ སིའི་ རྒྱལ་ ཕ་ རི་ སིའི་ ནང་ འཚོགས་ ཡོད་ ལ། ཚོགས་ ཆེན་ ཐོག་ ཡུ་ རོབ་ གནས་ སྡོད་ ཁ་ འཐོར་ བོད་ མི་ ཚོས་ བོད་ དོན་ འཐབ་ རྩོད་ ཀྱི་ ལངས་ ཕྱོགས་ དང་ ། ས་ ཁུལ་ སོ་ སོ་ ནས་ བོད་ ཀྱི་ ཆོས་ རིག་ ཤེས་ ཡོན་ བརྒྱུད་ འཛིན། དང་ བླངས་ དཔྱ་ དངུལ་ དང་ ། བཙན་ བྱོལ་ བོད་ མིའི་ སྤྱི་ ཚོགས་ ནང་ དཔལ་ འབྱོར་ རོགས་ དངུལ་ བསྡུ་ རུབ། དེ་ བཞིན་ ལས་ འགུལ་ མཉམ་ འབྲེལ་ ཡོང་ ཐབས་ སོགས་ ཀྱི་ ཐད་ གོ་ བསྡུར་ བརྒྱུད་ གྲོས་ ཆོད་ ཁག་ བདུན་ བཞག་ ཡོད་ འདུག ཐེངས་ འདིའི་ ཚོགས་ ཆེན་ ནང་ ཡུ་ རོབ་ རྒྱལ་ ཁབ་ བཅུ་ གཉིས་ ཀྱི་ བོད་ རིགས་ ཚོགས་ པའི་ སྐུ་ ཚབ་ བཞི་ བཅུ་ ཞེ་ དྲུག་ ཚོགས་ ཞུགས་ གནང་ ཡོད་ འདུག

ཉིན་ གཉིས་ རིང་ གི་ ཡུ་ རོབ་ བོད་ རིགས་ མི་ མང་ ཚོགས་ ཆེན་ དེ་ རྒྱལ་ ས་ ཕ་ རི་ སིའི་ རྫོང་ ཁག་ བཅུ་ གཅིག་ གི་ གཞུང་ འབྲེལ་ མཛད་ སྒོའི་ ཚོམས་ ཁང་ དུ་ འཚོགས་ ཡོད་ ལ། མཛད་ སྒོའི་ སྐུ་ མགྲོན་ གཙོ་ བོར་ བོད་ གཞུང་ ཡུ་ རོབ་ སྐུ་ ཚབ་ དོན་ གཅོད་ བཀྲ་ ཤིས་ དབང་ འདུས་ ལགས་ དང་ ། ཕ་ རི་ སིའི་ རྫོང་ ཁག་ བཅུ་ གཅིག་ གི་ གྲོང་ ཁྱེར་ སྤྱི་ ཁྱབ་ པ་ སྐུ་ ཞབས་ པ་ ཊིར་ བྷི་ ལོན་ ཤེ་ ལགས་ གཉིས་ ཕེབས་ ཡོད་ པ་ མ་ ཟད། བཙན་ བྱོལ་ བོད་ གཞུང་ གི་ བཀའ་ ཁྲི་ ཟམ་ གདོང་ རིན་ པོ་ ཆེ་ མཆོག་ གིས་ ཀྱང་ དམིགས་ བསལ་ གསུང་ འཕྲིན་ ཞིག་ བསྩལ་ ཡོད་ འདུག བཀའ་ ཁྲིའི་ གསུང་ འཕྲིན་ ནང་ ༼ ཉེ་ བའི་ ལོ་ ངོ་ བཅུ་ ཕྲག་ ལྷག་ ཙམ་ གྱི་ རིང་ ཡུ་ རོབ་ ས་ ཁུལ་ གང་ སར་ བོད་ རིགས་ མི་ འབོར་ ཇེ་ མང་ དུ་ ཕྱིན་ པའི་ དབང་ གིས་ སྒྲིག་ འཛུགས་ དང་ སྤྱི་ ཚོགས་ ཀྱི་ ལས་ དོན་ གང་ སར་ དགའ་ སྤོབས་ འོས་ པའི་ མདུན་ སྐྱོད་ བྱུང་ ཡོད་ པ་ མ་ ཟད། འབྱུང་ འགྱུར་ ཡང་ ཁུལ་ དེར་ བོད་ རིགས་ ཡོངས་ རྫོགས་ མཉམ་ རུབ་ ཀྱི་ ལམ་ ནས་ བོད་ ཀྱི་ རྩ་ དོན་ ཆབ་ སྲིད་ དང་ ། ཆོས་ རིག་ འཛིན་ སྐྱོང་ དང་ ཁྱབ་ སྤེལ། གཞོན་ རབས་ ལ་ བོད་ ཀྱི་ སྐད་ ཡིག་ རིག་ གཞུང་ གཙོ་ གྱུར་ ཤེས་ ཡོན་ སློབ་ གསོ། བཙན་ བྱོལ་ བོད་ མིའི་ སྤྱི་ ཚོགས་ ཀྱི་ བདེ་ དོན་ སོགས་ གང་ ཅིའི་ ཐོག་ འབུར་ དུ་ ཐོན་ པའི་ བྱ་ བཞག་ རླབས་ ཆེ་ རྒྱུན་ ལྡན་ དུ་ སྤེལ་ ཐུབ་ པའི་ ཡིད་ ཆེས་ བརྟན་ པོ་ ཡོད། ༽ཅེས་ དང་ ། ༼ ད་ ལམ་ ལྷན་ ཚོགས་ འདིའི་ གྲོས་ གཞི་ ཁག་ གི་ ནང་ བཙན་ བྱོལ་ མང་ གཙོའི་ གཞུང་ དང་ ། གཉིས་ སྨན་ དབུ་ མའི་ ལམ་ གྱི་ སྲིད་ བྱུས་ བཅས་ ལ་ རྒྱབ་ སྐྱོར་ དང་ ། སྤྱི་ སྨན་ གྱི་ ལས་ གཞི་ ཁག་ གི་ ཆེད་ དཔལ་ འབྱོར་ འདུ་ འགོད་ གནང་ ཐབས་ སོགས་ གལ་ གནད་ ཆེ་ ཞིང་ ། དུས་ ཀྱི་ དགོས་ མཁོ་ དང་ འཚམས་ པའི་ གནད་ དོན་ ཁག་ འཇོག་ གནང་ མཛད་ འདུག་ པ་ ལྟར་ ཚང་ མས་ བློ་ གྲོས་ ཀྱི་ ནུས་ རྩལ་ གཅིག་ ཏུ་ སྤུངས་ ཏེ་ ཕུག་ རྒྱང་ རིང་ བའི་ འཆར་ སྣང་ ལ་ གཞི་ བཅོལ་ བའི་ ལས་ འཆར་ དང་ ཐབས་ བྱུས་ ཀྱི་ གྲོས་ ཆོད་ དོན་ སྙིང་ ལྡན་ པ་ བཞག་ སྟེ། ཁུལ་ དེའི་ བོད་ རིགས་ ཡོངས་ ཀྱི་ གོང་ བུའི་ ནུས་ པ་ གཅིག་ སྒྲིལ་ གྱི་ ངང་ སྤྱི་ སྨན་ ལས་ འགུལ་ གྱི་ ཤུགས་ ཚད་ གོང་ མཐོར་ སྤེལ་ བའི་ ཡིད་ ཆེས་ ཡོད། ༽ ཅེས་ ཡུ་ རོབ་ ནང་ བོད་ རིགས་ ཇེ་ མང་ དུ་ ཕྱིན་ པ་ དེས་ བོད་ ཀྱི་ སྒྲིག་ འཛུགས་ དང་ སྤྱི་ ཚོགས་ ལས་ དོན་ སོགས་ ལ་ མདུན་ སྐྱོད་ བྱུང་ བ་ མ་ ཟད། ཐེངས་ འདིའི་ གྲོས་ གཞི་ ཁག་ ནི་ ད་ ལྟའི་ ཆར་ དུས་ ཀྱི་ དགོས་ མཁོ་ དང་ འཚམས་ པར་ བརྟེན་ ཚང་ མས་ བློ་ གྲོས་ ཀྱི་ ནུས་ རྩལ་ གཅིག་ ཏུ་ སྒྲིལ་ ནས་ དོན་ སྙིང་ ལྡན་ པའི་ གྲོས་ ཆོད་ འཇོག་ ཐུབ་ པའི་ ཐུགས་ རེ་ གནང་ ཡོད་ འདུག་ ལ། ཡུ་ རོབ་ སྐུ་ ཚབ་ བཀྲ་ ཤིས་ དབང་ འདུས་ ལགས་ ཀྱིས་ ཀྱང་ དེ་ མཚུངས་ གསུང་ བཤད་ གནང་ ཡོད།

སྐུ་ མགྲོན་ གཙོ་ བོ་ སྐུ་ ཞབས་ པ་ ཊིར་ བྷི་ ལོན་ ཤེ་ ལགས་ ཀྱིས་ ༼ ང་ ཡུ་ རོབ་ ཚོགས་ ཆེན་ སྟེང་ བཅར་ ནས་ རྒྱལ་ ཁབ་ མང་ པོའི་ སྐུ་ ཚབ་ འཛོམས་ ས་ འདིར་ སྐད་ ཆ་ བཤད་ རྒྱུ་ བྱུང་ བར་ ཧ་ ཅང་ དགའ་ བོ་ བྱུང་ ། ང་ རྫོང་ ཁག་ བཅུ་ གཅིག་ པ་ འདིའི་ སྤྱི་ ཁྱབ་ པ་ གཅིག་ པུ་ མིན་ པར་ ཧྥ་ རན་ སིའི་ གྲོས་ ཚོགས་ འོག་ མའི་ འཐུས་ མི་ དང་ ། གྲོས་ ཚོགས་ འོག་ མའི་ བོད་ དོན་ རྒྱབ་ སྐྱོབ་ ཚོགས་ པའི་ ཚོགས་ གཞོན་ ཡིན། ང་ དང་ ངའི་ རྫོང་ ཁག་ འདི་ བོད་ དོན་ རྒྱབ་ སྐྱོར་ བ་ ཞིག་ ཡིན། ནམ་ རྒྱུན་ ནས་ བོད་ དོན་ དང་ འབྲེལ་ བའི་ ལས་ དོན་ གང་ མང་ ཞིག་ བྱས་ དང་ བྱེད་ བཞིན་ ཡོད། དེ་ རིང་ རྣམ་ པ་ ཚོས་ ཐུགས་ སྣང་ བྱུང་ ཡོད་ ན། རྫོང་ ཁག་ བཅུ་ གཅིག་ པ་ འདིའི་ སྒོ་ ཆེན་ སྟེང་ བོད་ ཀྱི་ རྒྱལ་ དར་ བཙུགས་ ཡོད། སྒོ་ ཆེན་ གཡས་ ཟུར་ གྱི་ རྩིག་ ངོས་ སུ་ ༼ རྫོང་ མཁར་ བཅུ་ གཅིག་ པ། བོད་ ཀྱི་ རྒྱལ་ ས་ ལྷ་ ས་ གྲོང་ ། ༽ཞེས་ པའི་ སྒོ་ བྱང་ བཀལ་ ཡོད། བོད་ ཀྱི་ རྒྱལ་ དར་ དེ་ ལོ་ ལྟར་ གསུམ་ བཅུའི་ དུས་ དྲན་ ཉིན་ འཛུགས་ གིན་ ཡོད་ ། རྒྱ་ ནག་ གཞུང་ གིས་ དེང་ རབས་ འཛུགས་ སྐྲུན་ ཞེས་ པའི་ མིང་ སྙན་ འོག་ བོད་ ཀྱི་ རྒྱལ་ ས་ ལྷ་ སར་ གཏོར་ སྐྱོན་ གཏོང་ གི་ ཡོད་ རེད། ང་ ཚོས་ དེ་ ལ་ ངོ་ རྒོལ་ དང་ གནོན་ ཤུགས་ སྤྲོད་ ཆེད་ སྒོ་ བྱང་ དེ་ བཀལ་ བ་ ཡིན། འདི་ ཡང་ འཐུས་ མི་ ཚང་ མས་ སྤྱི་ མོས་ ཐོག་ ཐག་ བཅད་ པ་ རེད། ལོ་ རྒྱུས་ ཐོག་ རྫོང་ ཁག་ འདི་ གལ་ ཆེན་ པོ་ ཆགས་ ཡོད། འདི་ ལ་ སྒྲུང་ མང་ པོ་ ཞིག་ ཡོད་ པ་ རེད། རྫོང་ ཁག་ འདི་ ཧྥ་ རན་ སིའི་ གསར་ བརྗེ་ བྱུང་ ས་ དང་ པོ་ དང། རང་ དབང། འདྲ་ མཉམ། མཛའ་ སེམས། ཞེས་ པའི་ ཧྥ་ རན་ སིའི་ གཞུང་ འབྲེལ་ འབོད་ ཚིག་ འདི་ ཡང་ དང་ པོ་ རྗོང་ ཁག་ འདི་ ནས་ བྱུང་ བ་ རེད། ལོ་ རྒྱུས་ ཀྱི་ དོན་ སྙིང་ ངེས་ ཅན་ ལྡན་ པའི་ ས་ གནས་ འདིར་ ཡུ་ རོབ་ བོད་ རིགས་ མི་ མང་ ཚོགས་ ཆེན་ ཐེངས་ གཉིས་ པ་ འདི་ ཚོགས་ རྒྱུ་ བྱུང་ བ་ དེར་ ང་ རང་ ངོས་ ནས་ ཧ་ ཅང་ དགའ་ བོ་ བྱུང་ ། འདི་ ང་ ཚོའི་ སྤོབས་ པ་ ཞིག་ དང་ གཟི་ བརྗིད་ ཅིག་ ཡིན་ བསམ་ ཡོད། དེ་ རིང་ རྣམ་ པ་ ཚོས་ ས་ ཆ་ གནད་ འགག་ འདི་ འདྲ་ ཞིག་ ནས་ ཚོགས་ ཆེན་ ཚོགས་ པ་ དེ་ ལས་ དོན་ གོ་ བསྡུར་ ཙམ་ མིན་ པར་ མ་ འོངས་ པར་ བོད་ རྒྱལ་ ཁབ་ དང་ ། མི་ མང་ ལ་ རེ་ བ་ སྐྲུན་ ཐུབ་ པ་ དེ་ འདྲ་ ཞིག་ ལ་ རེ་ བ་ རྒྱག་ གི་ ཡོད། ངས་ གོང་ ནས་ ཧྥ་ རན་ སིའི་ གསར་ བརྗེ་ དང་ རྫོང་ ཁག་ འདིའི་ སྒྲུང་ བཤད་ དོན་ རང་ དབང་ འཐབ་ རྩོད་ ཀྱི་ ལས་ རིམ་ ཁྲོད་ བོད་ པ་ ཁེར་ རྐྱང་ མིན་ པར་ གཞུང་ དང་ མང་ ཚོགས་ གང་ མང་ ཞིག་ གིས་ རྒྱབ་ སྐྱོར་ བྱས་ དང་ བྱེད་ བཞིན་ ཡོད་ པ་ དེ་ ཡིན། མཉམ་ རུབ་ ཀྱི་ ནུས་ ཤུགས་ འདི་ འདྲ་ ལ་ བརྟེན་ ནས་ བོད་ ལ་ བདེ་ སྐྱིད་ ཀྱི་ ཉི་ མ་ འཆར་ རྒྱུའི་ རེ་ བ་ དང་ སྨོན་ ལམ་ ཡང་ འདེབས་ གི་ ཡོད།  ༽ཅེས་ ཁོང་ དང་ ཁོང་ གི་ རྫོང་ ཁག་ བཅུ་ གཅིག་ པས་ བོད་ དོན་ ལ་ རྒྱབ་ སྐྱོར་ བྱས་ དང་ བྱེད་ བཞིན་ ཡོད་ ལ། ཧྥ་ རན་ སིའི་ གསར་ བརྗེ་ ལོ་ རྒྱུས་ དང་ འབྲེལ་ བོད་ མིའི་ འཐབ་ རྩོད་ ཀྱི་ ལམ་ ཁ་ ཡག་ ཤོས་ གཉིས་ སྨན་ དབུ་ མའི་ ལམ་ ཡིན་ པའི་ ངོས་ འཛིན་ ཀྱང་ གནང་ གི་ ཡོད་ ལུགས་ གསུངས།

ཚོགས་ ཆེན་ དངོས་ གཞིའི་ སྐབས་ འཐུས་ མི་ རྣམས་ ཚོགས་ ཆུང་ ཁག་ བགོས་ ཀྱིས་ ཡུ་ རོབ་ བོད་ རིགས་ མི་ མང་ གི་ བོད་ དོན་ འཐབ་ རྩོད་ ཀྱི་ ལངས་ ཕྱོགས་ གསལ་ འདོན་ དང་ ། རྒྱལ་ ཁབ་ དང་ ས་ གནས་ སོ་ སོར་ བོད་ ཀྱི་ ཆོས་ རིག་ ཤེས་ ཡོན་ བརྒྱུད་ འཛིན། དང་ བླངས་ དཔྱ་ དངུལ་ དང་ ། རྒྱ་ བལ་ འབྲུག་ གསུམ་ གྱིས་ གཙོས་ བའི་ བཙན་ བྱོལ་ སྤྱི་ ཚོགས་ ནང་ དཔལ་ འབྱོར་ རོགས་ དངུལ་ བསྡུ་ རུབ། དེ་ བཞིན་ ཡུ་ རོབ་ རྒྱལ་ ཁབ་ ཁག་ གི་ བོད་ རིགས་ ཚོགས་ པ་ ཚང་ མའི་ ལས་ འགུལ་ མཉམ་ འབྲེལ་ ཡོང་ ཐབས་ དང་ ། ཆབ་ སྲིད་ ལས་ འགུལ་ སྤེལ་ སྟངས་ སོགས་ ཀྱིས་ མཚོན་ པའི་ གྲོས་ གཞི་ དོན་ ཚན་ བཞི་ ལྷག་ ཐོག་ གོ་ བསྡུར་ དང་ སྦྱང་ བཤད་ བྱས་ ཡོད་ པ་ དང་ ། གོ་ བསྡུར་ དང་ སྦྱང་ བཤད་ བརྒྱུད་ ༧གོང་ ས་ མཆོག་ གིས་ དབུ་ ཁྲིད་ པའི་ བཙན་ བྱོལ་ བོད་ གཞུང་ ནི་ བོད་ མི་ མང་ གི་ ངོས་ འཛིན་ ལྡན་ པའི་ ཁྲིམས་ མཐུན་ གྱི་ སྲིད་ གཞུང་ དང་ ། གཞིས་ བྱེས་ བོད་ མི་ ཡོངས་ ཀྱི་ འཕྲལ་ ཕུགས་ ཀྱི་ མངོན་ འདོད་ སྒྲུབ་ བྱེད་ དབུ་ མའི་ ལམ་ གྱི་ སྲིད་ བྱུས་ ལ་ ལྷག་ བསམ་ འགྱུར་ མེད་ ཀྱིས་ རྒྱབ་ སྐྱོར་ ཞུ་ རྒྱུ་ སོགས་ ཆབ་ སྲིད་ དང་ འབྲེལ་ བའི་ གྲོས་ ཆོད་ ཁག་ དྲུག་ དང་ ། ཡུ་ རོབ་ རྒྱལ་ ཁབ་ འདྲ་ མིན་ ནང་ འཚར་ ལོངས་ བྱུང་ བཞིན་ པའི་ མི་ རབས་ གསར་ པ་ ཚོར་ བོད་ ཡིག་ སློབ་ སྦྱོང་ སྤྲོད་ ཐབས། བོད་ ཡིག་ སྦྱོང་ བཞིན་ པའི་ སློབ་ ཕྲུག་ ཚོར་ བོད་ ཡིག་ འབྲི་ ཀློག་ དང་ གཞས་ སྣ་འགྲན་ བསྡུར། དབྱར་ ཁའི་ གུང་ གསེང་ དང་ བསྟུན་ སློབ་ ཕྲུག་ ཚོར་ བོད་ ཀྱི་ རིག་ གཞུང་ གི་ ཟབ་ སྦྱོང་ གོ་ སྒྲིག་ ཞུ་ རྒྱུ་ སོགས་ ཤེས་ ཡོན་ དང་ འབྲེལ་ བའི་ གྲོས་ ཆོད་ ཁག་ བཞི། ཡུ་ རོབ་ བོད་ རིགས་ ཚོགས་ པ་ ཁག་ གི་ དཔལ་ འབྱོར་ ཡར་ རྒྱས་ ཐད་ ཚང་ མས་ ལོ་ རེར་ ཚོགས་ དངུལ་ གཏན་ འབེབ་ ལྟར་ བསྡུ་ རྒྱུ་ དང་ ། ས་ གནས་ སྲིད་ གཞུང་ དང་ རྫོང་ སྡེ་ ཁག་ གཙོ་ བོ་ བྱས་ ཏེ་ འབྲེལ་ ཡོད་ ཚན་ པ་ བཅས་ ལ་ འཆར་ གཞི་ མཉམ་ སྒྲིག་ བྱས་ ཏེ་ དཔལ་ འབྱོར་ འདུ་ འགོད་ བྱེད་ རྒྱུ། བོད་ གཞུང་ གི་ ལས་ འཆར་ ངེས་ གཏན་ ལ་ གཞིགས་ ཏེ་ ལོ་ རེར་ ཡུ་ རོབ་ བོད་ རིགས་ མི་ རེའི་ ངོས་ ནས་ བོད་ གཞུང་ ལ་ ཡུ་ སྒོར་ རེའི་ ཞལ་ འདེབས་ འབུལ་ རྒྱུ་ སོགས་ དཔལ་ འབྱོར་ དང་ འབྲེལ་ བའི་ གྲོས་ ཆོད་ ཁག་ བདུན། ཡུ་ རོབ་ སྐུ་ ཚབ་ དོན་ གཅོད་ དང་ བོད་ རིགས་ ཚོགས་ པ་ ཁག་ ཟུང་ འབྲེལ་ གྱིས་ དཔྱ་ ཁྲལ་ འབུལ་ མི་ མང་ དུ་ གཏོང་ རྒྱུ། དཔྱ་ ཁྲལ་ འབུལ་ མི་ ཇེ་ མང་ དུ་ ཡོང་ ཐབས་ ལ་ བཙན་ བྱོལ་ གཞུང་ ནས་ ད་ ཡོད་ ཀྱི་ དཔྱ་ ཁྲལ་ དཀའ་ ངལ་ སེལ་ ཆེད་ དམིགས་ བསལ་ ཐུགས་ སྣང་ ཡོང་ རྒྱུར་ རེ་ སྐུལ་ ཞུ་ རྒྱུ་ སོགས་ ལག་ དེབ་ ལྗང་ ཁུ་ དང་ འབྲེལ་ བའི་ གྲོས་ ཆོད་ ཁག་ བཞི། ཡུ་ རོབ་ བོད་ རིགས་ ཚོགས་ པའི་ འབྲེལ་ ལམ་ དང་ ལས་ འགུལ་ གོང་ འཕེལ་ ཡོང་ སླད་ ཚོགས་ གཙོ་ རྣམས་ ཀྱིས་ དྲ་ ལམ་ ནས་ ཟླ་ རེར་ ཚོགས་ འདུ་ རེ་ བསྐོང་ རྒྱུ་ དང་ ། དབྱར་ ཁའི་ གུང་ གསེང་ སྐབས་ ས་ གནས་ རང་ ནས་ བྱིས་ པའི་ རིག་ གཞུང་ དུས་ སྟོན་ གོ་ སྒྲིག་ གམ། ཡང་ ན་ ཡུ་ རོབ་ བོད་ རིགས་ ཚོགས་ པ་ ཁག་ རེས་ མོས་ མཉམ་ འབྲེལ་ གྱིས་ ས་ གནས་ གཅིག་ ཏུ་ འཛོམས་ ནས་ བྱིས་ པའི་ རིག་ གཞུང་ དུས་ སྟོན་ གོ་ སྒྲིག་ བྱ་ རྒྱུ་ སོགས་ ལས་ འགུལ་ མཉམ་ འབྲེལ་ གོང་ འཕེལ་ དང་ འབྲེལ་ བའི་ གྲོས་ ཆོད་ ཁག་ བཞི། བོད་ རིགས་ ཚོགས་ པ་ ཁག་ དང་ རང་ གཞུང་ སྐུ་ ཚབ་ དོན་ གཅོད། རྒྱལ་ སྤྱིའི་ བོད་ དོན་ ལས་ འགུལ་ ཁང་ སོགས་ མཉམ་ རུབ་ ཀྱིས་ ལོ་ གཅིག་ ནང་ ཡུ་ རོབ་ གྲོས་ ཚོགས་ ནང་ བོད་ དོན་ ཞུ་ གཏུགས་ ཀྱི་ ལས་ འགུལ་ སྤེལ་ རྒྱུ། ལོ་ གཉིས་ རེའི་ མཚམས་ སུ་ ཡུ་ རོབ་ བོད་ རིགས་ ཚོགས་ པ་ ཁག་ མཉམ་ འབྲེལ་ གྱིས་ ས་ གནས་ གཅིག་ ཏུ་ གསུམ་ བཅུའི་ དུས་ དྲན་ སྲུང་ བརྩི་ བྱེད་ བཞིན་ པ་ དེ་ རྒྱུན་ འཁྱོངས། ཡུ་ རོབ་ ས་ གནས་ ཁག་ ཏུ་ བོད་ རྒྱ་ མཐུན་ ཚོགས་ གསར་ འཛུགས་ ཆེད་ ས་ གནས་ རྒྱ་ རིགས་ མི་ སྣ་ ཁག་ དང་ འབྲེལ་ ལམ་ གོང་ འཕེལ་ བཏང་ སྟེ་ བོད་ དོན་ གོ་ རྟོགས་ དང་ རིག་ གཞུང་ བརྗེ་ རེས་ བྱ་ རྒྱུ་ སོགས་ ཆབ་ སྲིད་ ལས་ འགུལ་ དང་ འབྲེལ་ བའི་ གྲོས་ ཆོད་ ཁག་ བཞི་ སྟེ་ ཁྱོན་ བསྡོམས་ གྲོས་ ཆོད་ ཁག་ ཉེར་ དགུ་ ལ་ སྤྱི་ མོས་ དང་ མང་ མོས་ ཀྱི་ ལམ་ ནས་ གཏན་ འབེབ་ གནང་ ཡོད་ འདུག དེ་ བཞིན་ ཚོགས་ འདུའི་ ནང་ རྒྱལ་ སྤྱིའི་ བོད་ དོན་ ལས་ འགུལ་ ཁང་ གི་ འབྲེལ་ མཐུད་ པ་ སྐུ་ ཞབས་ ཝན་ སང་ མ་ ཏེ་ ལགས་ ཀྱིས་ ཡུ་ རོབ་ མཉམ་ འབྲེལ་ མཐུན་ ཚོགས་ ཀྱི་ ལམ་ ལུགས་ ངོ་ སྤྲོད་ དང་ ། ཡུ་ རོབ་ ནང་ བོད་ དོན་ ལས་ འགུལ་ སྤེལ་ ཕྱོགས་ ཐད་ གསུང་ བཤད་ དང་ ། ཕ་ རི་ སིའི་ ས་ ཁུལ་ བདུན་ པའི་ གཙུག་ ལག་ སློབ་ གཉེར་ ཁང་ གི་ སློབ་ དཔོན་ ཆེན་ མོ་ སྐུ་ ཞབས་ ཧན་ རེ་ ཨོ་ ཌིན་ ལགས་ ཀྱིས་ ༼ བོད་ མི་ ཚོས་ རྗེའུ་ མི་ རིགས་ ཀྱི་ རང་ དབང་ འཐབ་ རྩོད་ ཀྱི་ ལོ་ རྒྱུས་ ནས་ བསླབ་ བྱ་ གང་ ལེན་ ཐུབ་ བམ། ༽ཞེས་ པའི་ བརྗོད་ གཞི་ ཐོག་ གསུང་ བཤད་ གནང་ ཡོད་ པ་ མ་ ཟད། ཡུ་ རོབ་ སྤྱི་ འཐུས་ འོས་ མི་ བཞིས་ སྤྱི་ འཐུས་ འོས་ བསྡུའི་ ཐད་ བགྲོ་ གླེང་ གནང་ ཡོད་ འདུག

ཡུ་ རོབ་ བོད་ རིགས་ མི་ མང་ གི་ ཚོགས་ ཆེན་ དང་ པོ་ དེ་ ཕྱི་ ལོ་ ཉིས་ སྟོང་ བརྒྱད་ ཀྱི་ ཟླ་ བཅུ་ བའི་ ནང་ སུད་ སི་ གྲོང་ ཁྱེར་ སྦི་ སེལ་ དུ་ འཚོགས་ ཡོད་ པ་ དང་ ། སྐབས་ དེར་ ཡུ་ རོབ་ རྒྱལ་ ཁབ་ བཅོ་ ལྔའི་ བོད་ རིགས་ ཚོགས་ པའི་ སྐུ་ ཚབ་  ༡༢༠ ལྷག་ ལྷན་ འཛོམས་ གནང་ ཡོད་ འདུག ཚོགས་ ཆེན་ ཐེངས་ དང་ པོའི་ སྐབས་ ཡུ་ རོབ་ བོད་ རིགས་ ཚོགས་ པ་ ཁག་ མཉམ་ འབྲེལ་ གྱི་ ཚོགས་ པ་ གསར་ པ་ ཞིག་ གམ། ཡང་ ན་ ལས་ ཁུངས། རྒྱུན་ ལས་ ལྟ་ བུ་ སོགས་ ཟུར་ དུ་ འཛུགས་ རྒྱུར་ གྲོས་ འཆམ་ བྱུང་ མེད་ ནའང་ ། ཚོགས་ ཆེན་ བསྐོང་ རྒྱུ་ གལ་ ཆེན་ པོ་ ཡིན་ སྟབས་ ལོ་ གཉིས་ རེའི་ མཚམས་ ཚོགས་ ཆེན་ ཐེངས་ རེར་ ཚུགས་ རྒྱུར་ མང་ མོས་ གྲོས་ འཆམ་ བྱུང་ ཡོད་ འདུག ཐེངས་ འདིའི་ ཚོགས་ ཆེན་ སྟེང་ སུད་ སི་ དང་ ། འཇར་ མན། སུ་ ཝེ་ ཌན་ གསུམ་ ནས་ དངོས་ སུ་ ཚོགས་ བཅར་ བ་ ཕེབས་ ཐུབ་ མེད་ ནའང་ ། ཨོ་ སི་ ཊི་ རེ་ ཡ་ དང་ ། བྷེལ་ ཇམ། ཧོ་ ལན་ ཌི། སི་ པན། ཨེར་ ལན་ ཌི། ཨེ་ ཊ་ ལི། ནོར་ ཝེ། དབྱིན་ ལན། ཌན་ མག ཧང་ གྷ་ རི། པོ་ ལན་ ཌི། ཧྥ་ རན་ སི་ སོགས་ རྒྱལ་ ཁབ་ བཅུ་ གཉིས་ ཀྱི་ བོད་ རིགས་ ཚོགས་ པའི་ སྐུ་ ཚབ་ བཞི་ བཅུ་ ཞེ་ དྲུག་ ཕེབས་ ཡོད་ པ་ དང་ ། དེ་ བཞིན་ འཇར་ མན་ དང་ ། བྷེལ་ ཇམ། སུད་ སི་ སོགས་ ནས་ ཟུར་ ཉན་ པ་ ལྔ་ བཅུ་ ལྷག་ དང་ ། སུད་ བོད་ མཛའ་ འབྲེལ་ ཚོགས་ པ་ དང། ཡུ་ རོབ་ བོད་ ཀྱི་ ས་ གནས་ གཞོན་ ནུ་ ཚོགས་ པ་ སོགས་ ཚོགས་ པ་ ཁག་ ཅིག་ ཟུར་ ཞུགས་ ཀྱི་ ཚུལ་ དུ་ ཕེབས་ ཡོད་ འདུག ཧྥ་ རན་ སིའི་ བོད་ རིགས་ ཚོགས་ པའི་ ཟློས་ གར་ དང་ ། བོད་ ཀྱི་ དཔལ་ ཡོན་ སློབ་ གྲྭའི་ བུ་ ཕྲུག་ རྒན་ པ་ ཚོ། ལི་ ཐང་ སྐྱིད་ སྡུག་ ཚོགས་ པ། བརྒྱ་ དང་ བཅོ་ ལྔའི་ རོལ་ གཞས་ ཚོགས་ པ། བློ་ བརྟན་ རྣམ་ གླིང་ སོགས་ ཚོགས་ པ་ དང་ མི་ སྒེར་ ཁག་ ཅིག་ གིས་ ཚོགས་ བཅར་ བ་ ཚོར་ ཞབས་ གཞས་ གཟིགས་ འབུལ་ ཞུས་ ཡོད་ པ་ དང་ ། ཚོགས་ ཆེན་ ཐེངས་ གསུམ་ པ་ དེ་ ཕྱི་ ལོ་ ཉིས་ སྟོང་ བཅུ་ གཉིས་ ལོའི་ ཟླ་ བཅུ་ བའི་ ནང་ སི་ པན་ དང་ ། ཨེ་ ཊ་ ལི། བྷེལ་ ཇམ་ གསུམ་ གང་ རུང་ ནང་ འཚོག་ གཏེན་ འཁེལ་ ཡོད་ འདུག

གསར་ འགོད་ པ། ཟླ་ བ་ ཚེ་ རིང་ །

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s